तळेगाव दाभाडे नगरपरिषदेत लोकहिताचा बुलंद आवाज विरोधी पक्षनेतेपदी निवड झाल्या नंतर संतोष मारूती भेगडें यांचे स्पष्ट मनोगत
तळेगाव दाभाडे नगरपरिषदेत लोकहिताचा बुलंद आवाज विरोधी पक्षनेतेपदी निवड झाल्या नंतर संतोष मारूती भेगडें यांचे स्पष्ट मनोगत
तळेगाव दाभाडे :
तळेगाव दाभाडे नगरपरिषदेत विरोधी पक्षनेतेपदी संतोष मारूती भेगडे यांची निवड झाल्यानंतर त्यांनी आपल्या भावना व्यक्त करताना लोकसेवा, पारदर्शकता आणि निर्भीड भूमिका यांचा ठाम निर्धार व्यक्त केला आहे. नगरपरिषदेतील ही जबाबदारी केवळ राजकीय पद नसून, जनतेच्या प्रश्नांसाठी संघर्ष करण्याची संधी असल्याचे त्यांनी स्पष्ट केले.
आपल्या मनोगतात भेगडे म्हणाले की, “तळेगाव दाभाडे नगरपरिषदेत मला विरोधी पक्षनेता पदाची जबाबदारी देण्यात आली, ही माझ्यासाठी अत्यंत सन्मानाची आणि अभिमानाची बाब आहे. माझ्यावर विश्वास टाकून मला ही संधी दिल्याबद्दल माझ्या सर्व सहकारी नगरसेवकांचे, पक्ष नेतृत्वाचे तसेच तळेगाव दाभाडेतील सर्व नागरिकांचे मी मनःपूर्वक आभार मानतो.” नागरिकांचा विश्वास हीच खरी ताकद असून, त्या विश्वासाला तडा जाऊ देणार नाही, असा विश्वासही त्यांनी व्यक्त केला.
विरोधी पक्षनेता म्हणून आपली भूमिका स्पष्ट करताना भेगडे यांनी सांगितले की, “माझी भूमिका केवळ सत्ताधाऱ्यांना विरोध करण्यापुरती मर्यादित राहणार नाही. नगरपरिषदेच्या कारभारात पारदर्शकता, उत्तरदायित्व आणि जनहिताला सर्वोच्च प्राधान्य देणे, हेच माझे मुख्य उद्दिष्ट राहील.” शहराच्या विकासासाठी उपयुक्त आणि सकारात्मक निर्णयांना पाठिंबा देण्यात येईल, मात्र जनतेच्या हिताविरोधात असलेल्या चुकीच्या धोरणांना ठामपणे विरोध केला जाईल, असेही त्यांनी ठासून सांगितले.
तळेगाव दाभाडे शहरासमोरील विविध प्रश्नांवर लक्ष केंद्रित करताना त्यांनी पाणीपुरवठा, स्वच्छता, रस्त्यांची दुरवस्था, आरोग्य सुविधा, शिक्षण व्यवस्था तसेच नागरिकांच्या मूलभूत सोयी-सुविधांचा उल्लेख केला. “या सर्व प्रश्नांसाठी मी सातत्याने आवाज उठवीन. सामान्य नागरिकांच्या समस्या सभागृहात प्रभावीपणे मांडून त्यांना न्याय मिळवून देण्यासाठी प्रामाणिक प्रयत्न करणे, हेच माझे कर्तव्य आहे,” असे भेगडे म्हणाले.
आपली पुढील वाटचाल निःपक्षपाती आणि निर्भीड राहील, असा निर्धार व्यक्त करत त्यांनी सांगितले की, “ही जबाबदारी म्हणजे सेवा करण्याची संधी आहे. लोकहिताला समर्पित राहून, कोणत्याही दबावाला न जुमानता सत्य आणि न्यायाची बाजू मांडण्याचा माझा संकल्प आहे.” विरोधी पक्षनेतेपदी संतोष भेगडे यांची निवड झाल्याने नगरपरिषदेतील चर्चांना अधिक धार येईल आणि नागरिकांच्या प्रश्नांना योग्य व्यासपीठ मिळेल, अशी अपेक्षा व्यक्त होत आहे.
