विज्ञानातून उज्ज्वल भवितव्याची पायाभरणी : तळेगाव दाभाडेत ‘अविष्कार मावळ विज्ञान प्रदर्शन २०२६’चा भव्य उपक्रम
विज्ञानातून उज्ज्वल भवितव्याची पायाभरणी : तळेगाव दाभाडेत ‘अविष्कार मावळ विज्ञान प्रदर्शन २०२६’चा भव्य उपक्रम
तळेगाव दाभाडे :
विद्यार्थ्यांमधील सुप्त वैज्ञानिक विचारांना चालना देण्यासाठी, संशोधनाची आवड निर्माण करण्यासाठी तसेच नवकल्पनांना योग्य व्यासपीठ उपलब्ध करून देण्यासाठी रोटरी क्लब ऑफ गोल्डन तळेगाव दाभाडे व रोट्रॅक्ट क्लब ऑफ गोल्डन तळेगाव दाभाडे यांच्या संयुक्त विद्यमाने ‘अविष्कार मावळ विज्ञान प्रदर्शन २०२६’ या भव्य विज्ञान प्रदर्शनाचे आयोजन करण्यात आले आहे. हे प्रदर्शन शनिवार, दिनांक १० जानेवारी २०२६ रोजी सकाळी ९ ते दुपारी २ वाजेपर्यंत सुशीला मंगल कार्यालय, लिंब फाटा, तळेगाव दाभाडे येथे संपन्न होणार आहे.
तळेगाव दाभाडे शहरात प्रथमच एवढ्या व्यापक स्वरूपात विज्ञान प्रदर्शनाचे आयोजन करण्यात येत असून, या उपक्रमामुळे संपूर्ण मावळ तालुक्याचे लक्ष वेधले गेले आहे. या प्रदर्शनात मावळ परिसरातील ५० हून अधिक शाळांमधील विद्यार्थ्यांनी तयार केलेले १०० पेक्षा अधिक विज्ञान प्रकल्प मांडण्यात येणार असून, हे प्रकल्प सर्वसामान्य नागरिकांसाठी खुले असणार आहेत. विद्यार्थ्यांना आपल्या कल्पकतेचे आणि प्रयोगशीलतेचे सादरीकरण करण्याची ही एक अनोखी संधी ठरणार आहे.
प्रदर्शनात सादर होणारे प्रकल्प पर्यावरण संरक्षण, जलसंधारण, ऊर्जा बचत, आरोग्य व स्वच्छता, स्मार्ट तंत्रज्ञान, आधुनिक शेती, रोबोटिक्स, कृत्रिम बुद्धिमत्ता तसेच दैनंदिन जीवनातील विविध समस्यांवर आधारित उपाययोजनांवर केंद्रित असतील. या माध्यमातून विद्यार्थ्यांची निरीक्षणशक्ती, तांत्रिक समज, नवसंकल्पना मांडण्याची क्षमता आणि समस्यांवर शास्त्रीय दृष्टिकोनातून उपाय शोधण्याची तयारी स्पष्टपणे दिसून येणार आहे.
या विज्ञान प्रदर्शनासाठी डॉ. चिराग मधुसूदन खळदे हे प्रमुख पाहुणे म्हणून उपस्थित राहणार असून, रोटरी डिस्ट्रिक्ट डायरेक्टर रो. वसंतराव माळुंजकर यांची विशेष उपस्थिती लाभणार आहे. मान्यवरांच्या उपस्थितीत विद्यार्थ्यांचे मनोबल वाढणार असून, त्यांना योग्य मार्गदर्शन व प्रेरणा मिळणार आहे.
या उपक्रमाबाबत बोलताना रोटरी क्लब ऑफ गोल्डन तळेगाव दाभाडेचे अध्यक्ष रो. संतोष परदेशी यांनी सांगितले की, “आजच्या स्पर्धात्मक युगात विद्यार्थ्यांमध्ये केवळ पाठांतर न करता प्रयोगशीलता, संशोधनवृत्ती आणि नवकल्पनांचा विकास होणे अत्यंत गरजेचे आहे. ‘अविष्कार मावळ विज्ञान प्रदर्शन’ हे त्याच दिशेने टाकलेले एक महत्त्वाचे पाऊल असून, ग्रामीण व शहरी भागातील विद्यार्थ्यांच्या गुणवत्तेला चालना देणारा उपक्रम आहे.”
तळेगाव दाभाडे व परिसरातील नागरिकांनी या विज्ञान प्रदर्शनास मोठ्या संख्येने उपस्थित राहून विद्यार्थ्यांनी सादर केलेले विविध प्रकल्प पाहावेत, त्यांचे कौतुक करावे आणि विद्यार्थ्यांना प्रोत्साहन द्यावे, असे आवाहन प्रकल्प प्रमुख रो. दीक्षा वायकर व सहप्रकल्प प्रमुख रो. दिपाली शिंदे यांनी केले आहे.
‘अविष्कार मावळ विज्ञान प्रदर्शन २०२६’ हे केवळ एक दिवसाचे प्रदर्शन न राहता, भविष्यातील शास्त्रज्ञ, अभियंते, संशोधक आणि नवउद्योजक घडविण्यासाठी प्रेरणादायी ठरेल, असा विश्वास आयोजकांनी व्यक्त केला आहे.
