शिवजयंतीनिमित्त तळेगाव दाभाडेत मोफत शासकीय योजना व आरोग्य शिबिर बापुसाहेब भेगडे युवा मंचाचा सामाजिक उपक्रम
शिवजयंतीनिमित्त तळेगाव दाभाडेत मोफत शासकीय योजना व आरोग्य शिबिर
बापुसाहेब भेगडे युवा मंचाचा सामाजिक उपक्रम
तळेगाव दाभाडे : शिवजयंतीचे औचित्य साधत बापुसाहेब भेगडे युवा मंच व तुकाराम नगर मित्र मंडळ यांच्या संयुक्त विद्यमाने तळेगाव दाभाडे येथे मोफत शासकीय योजना शिबिर तसेच भव्य आरोग्य शिबिर आणि शिवव्याख्यानाचे आयोजन करण्यात आले आहे. सामाजिक बांधिलकी जपत सर्वसामान्य नागरिकांना शासनाच्या विविध योजनांचा लाभ सुलभ पद्धतीने मिळावा, या उद्देशाने हा उपक्रम राबविण्यात येत असल्याची माहिती आयोजकांनी दिली.
दि. १८ व १९ फेब्रुवारी रोजी सकाळी १० ते दुपारी ३ या वेळेत गजानन महाराज मंदिर, तुकाराम नगर, तळेगाव दाभाडे येथे हे शिबिर पार पडणार आहे. दोन दिवस चालणाऱ्या या उपक्रमात विविध शासकीय कागदपत्रांशी संबंधित सेवा पूर्णपणे मोफत उपलब्ध करून दिल्या जाणार आहेत. नागरिकांना कार्यालयांच्या फेऱ्या माराव्या लागू नयेत आणि आवश्यक प्रक्रिया एकाच ठिकाणी पूर्ण व्हावी, यासाठी विशेष व्यवस्था करण्यात आली आहे.
शिबिरात आयुष्मान भारत कार्ड, ई-श्रम कार्ड (वयोगट १८ ते ५९ वर्षे), मुख्यमंत्री लाडकी बहीण योजना केवायसी, रेशन कार्ड केवायसी, किसान कार्ड, मतदार ओळखपत्रासाठी नवीन नोंदणी व दुरुस्ती, स्मार्ट मतदार कार्ड तसेच इतर विविध शासकीय योजनांची नोंदणी व कार्ड तयार करून देण्याची सुविधा उपलब्ध असणार आहे. विशेषतः असंघटित क्षेत्रातील कामगारांसाठी ई-श्रम कार्ड नोंदणी व महिलांसाठी मुख्यमंत्री लाडकी बहीण योजनेची केवायसी प्रक्रिया या शिबिरात करण्यात येणार आहे.
शासकीय योजनांबाबत माहितीअभावी अनेक पात्र नागरिक लाभापासून वंचित राहतात. कागदपत्रांची पूर्तता, ऑनलाइन प्रक्रिया किंवा तांत्रिक अडचणींमुळेही अनेकांना योजनांचा लाभ घेणे शक्य होत नाही. ही बाब लक्षात घेऊन नागरिकांना मार्गदर्शनासह मोफत सेवा देण्याचा प्रयत्न या उपक्रमातून करण्यात येत आहे. स्वयंसेवकांच्या मदतीने प्रत्येक अर्जदाराला आवश्यक ती माहिती व प्रक्रिया समजावून सांगितली जाणार आहे.
यासोबतच शिवजयंतीनिमित्त १९ फेब्रुवारी २०२६ रोजी सकाळी १० ते दुपारी ३ वाजेपर्यंत भव्य आरोग्य शिबिराचेही आयोजन करण्यात आले आहे. या शिबिरात जनरल मेडिसिन, कान-नाक-घसा तपासणी, स्त्रीरोग तपासणी, बालरोग तपासणी तसेच इतर आवश्यक वैद्यकीय सेवा उपलब्ध करून दिल्या जाणार आहेत. विविध आजारांचे प्राथमिक निदान, सल्ला व उपचारासाठी तज्ञ डॉक्टर उपस्थित राहणार आहेत. सर्व तपासण्या विनामूल्य करण्यात येणार असल्याने नागरिकांनी या संधीचा लाभ घ्यावा, असे आवाहन करण्यात आले आहे.
शिवजयंती निमित्त आयोजित शिवव्याख्यान कार्यक्रमाद्वारे छत्रपती शिवाजी महाराजांच्या विचारांचा जागर प्रसार करण्याचाही संकल्प आयोजकांनी व्यक्त केला आहे. शिवजयंती हा केवळ उत्सव नसून समाजहिताच्या कार्याला चालना देण्याचा दिवस आहे, या भावनेतून सामाजिक उपक्रमांची सांगड घालण्यात आली आहे.
शिबिराचा लाभ घेण्यासाठी नागरिकांनी आधार कार्ड, आधार लिंक मोबाईल क्रमांक, ७/१२ उतारा (लागू असल्यास), रेशन कार्ड, वीज बिल, बँक पासबुक, पॅन कार्ड तसेच पासपोर्ट साईज फोटो सोबत आणावेत, असे आवाहन करण्यात आले आहे. मतदार ओळखपत्रासाठी नवीन नोंदणी किंवा दुरुस्ती करावयाची असल्यास संबंधित कागदपत्रे आवश्यक राहतील.
या उपक्रमाचे आयोजन सौ. सुरेखाताई निलेश भेगडे (नगरसेविका, तळेगाव दाभाडे नगर परिषद) व सागर (भैय्या) बोडके (नगरसेवक, तळेगाव दाभाडे नगर परिषद) यांच्या मार्गदर्शनाखाली करण्यात आले आहे. स्थानिक स्तरावर विविध सामाजिक उपक्रम राबविणाऱ्या बापुसाहेब भेगडे युवा मंचाच्या या पुढाकाराचे नागरिकांकडून स्वागत होत आहे.
यासंदर्भात बोलताना सागर (भैय्या) बोडके यांनी सांगितले की, शिवजयंती हा प्रेरणेचा दिवस आहे. शासनाच्या योजना खऱ्या अर्थाने शेवटच्या घटकापर्यंत पोहोचाव्यात, यासाठी आम्ही प्रयत्नशील आहोत. माहितीअभावी किंवा प्रक्रियेतील अडचणींमुळे कोणीही लाभापासून वंचित राहू नये, हीच आमची भूमिका आहे.
अधिक माहितीसाठी ९१८८०५०८५०८५ किंवा +९१ ८८०५० ८५०८५ या क्रमांकावर संपर्क साधावा, असे आयोजकांनी कळविले आहे. शिवजयंतीनिमित्त आयोजित या विशेष शिबिराचा जास्तीत जास्त नागरिकांनी लाभ घ्यावा, असे आवाहन करण्यात आले आहे.
