गोल्डन रनर्स क्लब आयोजित शिवशंभू दौड २०२६ (शिवज्योत) उत्साहात संपन्न
गोल्डन रनर्स क्लब आयोजित शिवशंभू दौड २०२६ (शिवज्योत) उत्साहात संपन्न
तळेगाव दाभाडे, दि. — छत्रपती शिवाजी महाराज व छत्रपती संभाजी महाराज यांच्या शौर्य, त्याग आणि स्वराज्याच्या विचारांना अभिवादन करण्यासाठी गोल्डन रनर्स क्लब आयोजित ‘शिवशंभू दौड २०२६ (शिवज्योत)’ हा उपक्रम अत्यंत उत्साहात व भक्तिभावाने संपन्न झाला. ऐतिहासिक परंपरेला साजेसा आणि तरुणाईला प्रेरणा देणारा हा सोहळा यंदा सलग दुसऱ्या वर्षी मोठ्या जल्लोषात पार पडला.
यावर्षी ऐतिहासिक तुंग किल्ला येथून पवित्र शिवज्योत प्रज्वलित करण्यात आली. छत्रपतींच्या पराक्रमाची साक्ष देणाऱ्या या दुर्गभूमीतून आणलेली शिवज्योत दौडीच्या माध्यमातून तळेगाव दाभाडे येथे पोहोचवण्यात आली. ही शिवज्योत केवळ अग्नीची ज्योत नसून स्वराज्याची प्रेरणा, एकतेचे प्रतीक आणि पुढील पिढीला शिवविचारांचा वारसा देणारी तेजस्वी निशाणी आहे. या माध्यमातून शिवरायांचे विचार तरुणांपर्यंत पोहोचवण्याचा संकल्प गोल्डन रनर्स क्लबने पुन्हा एकदा यशस्वीपणे पूर्ण केला.
या उपक्रमासाठी गोल्डन रनर्स क्लबचे अध्यक्ष श्री. विशाल खळदे, प्रकल्प अध्यक्ष श्री. के.डी. सावंत, सचिव श्री. मंगेश मरवाडी तसेच श्री. दीपक फल्ले यांनी विशेष परिश्रम घेतले. नियोजनबद्ध आयोजन, शिस्तबद्ध सहभाग आणि सुरक्षिततेची काळजी यामुळे संपूर्ण दौड यशस्वीरीत्या पार पडली.
शिवशंभू दौडमध्ये क्लबचे एकूण ४५ धावपटूंनी सहभाग नोंदवला. विशेष म्हणजे धावपटूंसोबत त्यांच्या मुला-मुलींनीही उत्स्फूर्त सहभाग घेत शिवभक्ती व कुटुंबीय एकतेचे सुंदर उदाहरण घडवले. तरुणाईसोबतच बालचमूचाही सहभाग या उपक्रमाचे वैशिष्ट्य ठरले.
तळेगाव दाभाडे येथील शिवशंभू स्मारक परिसरात शिवज्योतीचे आगमन होताच वातावरण ‘जय भवानी, जय शिवाजी’च्या घोषणांनी दुमदुमून गेले. डॉ. प्रवीण माने यांच्या शुभहस्ते शिवज्योत स्वीकारण्यात आली. उपस्थित शिवप्रेमींनी टाळ्यांच्या कडकडाटात आणि जल्लोषात शिवज्योतीचे स्वागत केले.
दौडीच्या अग्रभागी ढोल-ताशांच्या गजरात आराध्य चालके व तनुष फल्ले यांनी नेतृत्व करत संपूर्ण वातावरण शिवमय केले. यावेळी राजवीर खंडू सावंत यांनी बालशिवाजींची वेशभूषा साकारत सर्वांचे लक्ष वेधले, तर शार्दूल आकाश शिंदे आणि मृदुल आकाश शिंदे यांनी ‘लव-कुश’ यांच्या भूमिकेतून उपस्थितांची मने जिंकली. पारंपरिक वेशभूषा आणि देशभक्तीपर वातावरणामुळे कार्यक्रमाला विशेष रंगत आली.
सर्व धावपटूंच्या उत्साहपूर्ण उपस्थितीमुळे, काटेकोर नियोजनामुळे आणि सामूहिक सहभागामुळे शिवशंभू दौड २०२६ हा उपक्रम अत्यंत यशस्वी ठरला. शिवज्योतीच्या या पवित्र यात्रेमुळे तळेगाव दाभाडे परिसरात शिवविचारांची ज्योत अधिक प्रखर झाली असून, भविष्यातही अशाच प्रेरणादायी उपक्रमांचे आयोजन करण्याचा निर्धार आयोजकांनी व्यक्त केला.
