कामशेत पोलिसांचा वाहतूक शिस्तीवर कडक डोळा नियमभंग करणाऱ्यांवर तात्काळ कारवाईचा इशारा
कामशेत पोलिसांचा वाहतूक शिस्तीवर कडक डोळा नियमभंग करणाऱ्यांवर तात्काळ कारवाईचा इशारा
कामशेत : वाहतूक नियमांचे उल्लंघन करणाऱ्यांविरुद्ध कामशेत पोलिसांनी आता शून्य सहनशीलता धोरण अवलंबले असून, नियमभंग आढळताच तात्काळ कारवाई करण्यात येणार असल्याची ठाम सूचना पोलिस प्रशासनाने दिली आहे. नागरिकांच्या सुरक्षिततेला प्राधान्य देत ही मोहीम अधिक तीव्र करण्यात आली आहे.
कामशेत पोलिस ठाण्याचे पोलिस निरीक्षक आकाश पवार यांनी दिलेल्या माहितीनुसार, वाहनांवर काळ्या काचा (ब्लॅक फिल्म) लावलेल्या आढळल्यास संबंधित वाहनधारकावर तत्काळ दंडात्मक कारवाई करण्यात येणार आहे. याशिवाय, नियमबाह्य ‘फॅन्सी नंबर प्लेट’ वापरणाऱ्यांनाही सूट दिली जाणार नाही. अशा प्रकारे वाहनाची ओळख अस्पष्ट करणाऱ्या बाबींवर पोलिसांकडून विशेष लक्ष ठेवले जात आहे.
अल्पवयीन मुलांकडून वाहन चालवण्याच्या प्रकारात वाढ होत असल्याने, अशा घटनांकडे पोलिसांनी गांभीर्याने पाहण्याचा निर्णय घेतला आहे. जर अल्पवयीन व्यक्ती वाहन चालवताना आढळली, तर केवळ त्या व्यक्तीवर नव्हे, तर वाहन मालकावरही गुन्हा दाखल करण्यात येणार असल्याचे स्पष्ट करण्यात आले आहे.
तसेच, दुचाकीवर ‘ट्रिपल सीट’ प्रवास करणाऱ्यांवरही पोलिसांची करडी नजर राहणार आहे. वाहतुकीच्या नियमांचे उल्लंघन करत जीव धोक्यात घालणाऱ्या अशा प्रकारांना आळा घालण्यासाठी विशेष मोहीम राबवण्यात येत आहे.
दरम्यान, कर्णकर्कश आवाज करणारे सुधारित (मॉडिफाइड) सायलेन्सर बसवून ध्वनीप्रदूषण करणाऱ्या वाहनधारकांविरोधातही कठोर कारवाई केली जाणार आहे. अशा वाहनांमुळे नागरिकांना त्रास होत असल्याच्या तक्रारी वाढल्या असून, पोलिसांनी त्यावर नियंत्रण आणण्याचे ठरवले आहे.
वाहतूक नियम हे केवळ कायदे नसून नागरिकांच्या सुरक्षिततेचे कवच आहेत. प्रत्येकाने नियमांचे पालन करून जबाबदार नागरिकत्व दाखवावे, असे आवाहन पोलिस निरीक्षक आकाश पवार यांनी केले आहे.
कामशेत परिसरात वाहतूक शिस्त प्रस्थापित करण्यासाठी पोलिसांचा हा निर्धार पाहता, नियमभंग करणाऱ्यांनी सावध राहण्याची गरज निर्माण झाली आहे.
