लोणावळ्यातील दुर्दैवी घटनेने हळहळ; रायफल साफ करताना गोळी सुटून ॲड. अभय मराठे यांचा मृत्यू
लोणावळ्यातील दुर्दैवी घटनेने हळहळ; रायफल साफ करताना गोळी सुटून ॲड. अभय मराठे यांचा मृत्यू
लोणावळा : लोणावळा शहरात सोमवारी ५ ऑक्टोंबर रोजी एक दुर्दैवी आणि मन हेलावून टाकणारी घटना घडल्याची माहिती समोर आली आहे. रायफल साफ करीत असताना अचानक गोळी सुटल्याने लोणावळ्यातील माजी नगरसेवक माणिक मराठे यांचा मुलगा ॲड. अभय मराठे यांचा दुर्दैवी मृत्यू झाल्याचे सांगण्यात येत आहे.
या अनपेक्षित घटनेने मराठे कुटुंबीयांवर दुःखाचा डोंगर कोसळला असून, नातेवाईक, मित्रपरिवार आणि परिचितांमध्ये शोककळा पसरली आहे. हसतमुख आणि परिचित व्यक्तिमत्त्व असलेल्या ॲड. अभय मराठे यांच्या अकाली निधनाची बातमी समोर येताच लोणावळा परिसरात हळहळ व्यक्त होत आहे.
एका क्षणात घडलेल्या या दुर्दैवी घटनेने कुटुंबीयांवर मोठा आघात झाला आहे. नियतीचा हा आघात अत्यंत वेदनादायी असून, जवळच्या व्यक्तीच्या अचानक जाण्याचे दुःख शब्दांत व्यक्त करणे कठीण आहे.
मिळालेल्या प्राथमिक माहितीनुसार, अभय मराठे हे त्यांच्या घरातील रायफलची साफसफाई करत असताना अचानक रायफलमधून गोळी सुटली. ही गोळी त्यांच्या छातीमध्ये लागल्याने ते गंभीर जखमी झाले. घटनेनंतर कुटुंबीयांनी त्यांना तातडीने रुग्णालयात नेले. मात्र, रुग्णालयात नेल्यानंतर डॉक्टरांनी त्यांना मृत घोषित केले.
घटनेची माहिती मिळताच लोणावळा शहर पोलीस घटनास्थळी दाखल झाले. पोलिसांनी घटनास्थळाची पाहणी करून घटनेची माहिती घेतली. या घटनेची लोणावळा शहर पोलीस ठाण्यात आकस्मात मृत्यू म्हणून नोंद करण्यात आली आहे. रायफलमधून गोळी नेमकी कोणत्या परिस्थितीत सुटली, घटना कशी घडली आणि या घटनेमागील नेमके कारण काय आहे, याचा पोलीस तपास करीत आहेत.
या प्रकरणी लोणावळा शहर पोलीस निरीक्षक सचिन पाटील यांच्या मार्गदर्शनाखाली पुढील तपास सुरू आहे. पोलिसांच्या तपासानंतरच घटनेबाबत अधिकृत आणि सविस्तर माहिती समोर येणार आहे.
या घटनेमुळे परिसरात शोकमग्न वातावरण निर्माण झाले असून, मराठे कुटुंबीयांच्या दुःखात नागरिक सहभागी होत आहेत. ॲड. अभय मराठे यांच्या अकाली निधनाने त्यांच्या कुटुंबीय, मित्रपरिवार आणि परिचितांवर दुःखाचा डोंगर कोसळला आहे.
- ईश्वर त्यांच्या आत्म्यास चिरशांती देवो आणि मराठे कुटुंबीयांना हे दुःख सहन करण्याची शक्ती देवो, हीच भावपूर्ण श्रद्धांजली.
