ड्रग्स तस्करांना मकोका चा चाबूक विधानपरिषदेत मुख्यमंत्र्यांची धडाकेबाज घोषणा
ड्रग्स तस्करांना मकोका चा चाबूक विधानपरिषदेत मुख्यमंत्र्यांची धडाकेबाज घोषणा
मुंबई : राज्यात वाढत्या ड्रग्स तस्करीच्या साखळीवर विधानपरिषदेत आज जोरदार खडाजंगी रंगली. सदस्यांनी सरकारला धारेवर धरत अंमली पदार्थांच्या वाढत्या विळख्यावर कठोर कारवाईची मागणी केली. या चर्चेला उत्तर देताना मुख्यमंत्री देवेंद्र फडणवीस यांनी ‘झिरो टॉलरन्स’ची ठाम भूमिका जाहीर करत ड्रग्स तस्करीविरोधात मकोका अंतर्गत कारवाई करण्याची मोठी घोषणा केली.
राज्यात एमडीसह विविध अंमली पदार्थांची वाढती तस्करी हा गंभीर आणि समाजघातक प्रकार असल्याचे स्पष्ट करत मुख्यमंत्र्यांनी सांगितले की, ड्रग्सची तस्करी कोणत्याही परिस्थितीत खपवून घेतली जाणार नाही. या रॅकेटची पाळंमुळं उपटून टाकण्यासाठी सरकार निर्णायक पाऊल उचलत आहे. मकोका अंतर्गत कारवाईचा इशारा देताच तस्करांचे धाबे दणाणले असल्याची चर्चा राजकीय वर्तुळात रंगली आहे.
विधानपरिषदेत विशेषतः एमडी ड्रग्सच्या वाढत्या पुरवठ्यावरून सदस्यांनी चिंता व्यक्त केली. राज्यातील तरुणाईला लागलेला हा विळखा तोडण्यासाठी ठोस आणि दीर्घकालीन धोरण आखण्याची मागणी करण्यात आली. त्यावर उत्तर देताना मुख्यमंत्र्यांनी सांगितले की, ड्रग्जविरोधी कारवायांसाठी प्रत्येक ठिकाणी स्वतंत्र युनिट कार्यान्वित करण्यात आले आहे. जिल्हानिहाय मोठ्या धडक कारवाया राबवण्यात येत असून अनेक महत्त्वाच्या केसेस उघडकीस आणण्यात यश आले आहे.
ड्रग्स तस्करी हा केवळ कायदा-सुव्यवस्थेचा प्रश्न नाही, तर सामाजिक आणि आर्थिक सुरक्षेलाही बाधा आणणारा गुन्हा आहे असे ठाम मत मुख्यमंत्र्यांनी व्यक्त केले. मोठ्या आणि गुंतागुंतीच्या प्रकरणांसाठी केंद्र सरकारकडे फास्ट ट्रॅक कोर्टाची मागणी करण्यात आल्याची माहितीही त्यांनी दिली. त्यामुळे अंमली पदार्थांच्या प्रकरणांमध्ये जलदगतीने सुनावणी होऊन दोषींना कठोर शिक्षा होण्याचा मार्ग मोकळा होणार आहे.
सरकारच्या या भूमिकेमुळे ड्रग्स माफियांवर कायद्याचा लोखंडी पंजा बसणार असल्याचे चित्र स्पष्ट झाले आहे. विरोधकांनीही कारवाईचे स्वागत करत अंमलबजावणीत सातत्य ठेवण्याची अपेक्षा व्यक्त केली. राज्य सरकारच्या या निर्णायक भूमिकेमुळे ड्रग्स तस्करीच्या अंधाऱ्या जाळ्यावर आता कडक कायदेशीर प्रकाशझोत पडणार, अशी चिन्हे आहेत.
