तळेगावच्या कर्तृत्वाचा ‘अस्तोदय’ — व्यक्तिमत्त्वांचा उजाळा देणाऱ्या ग्रंथाचे दिमाखात प्रकाशन
तळेगावच्या कर्तृत्वाचा ‘अस्तोदय’ — व्यक्तिमत्त्वांचा उजाळा देणाऱ्या ग्रंथाचे दिमाखात प्रकाशन
तळेगाव दाभाडे : स्थानिक इतिहास, संस्कार आणि कर्तृत्वाचा साक्षीदार ठरणाऱ्या ‘अस्तोदय’ या चरित्रग्रंथाचा प्रकाशन सोहळा रविवारी (दि. २२ मार्च २०२६) सायंकाळी सहा वाजता उत्साहपूर्ण वातावरणात पार पडला. तळेगाव दाभाडे येथील जेष्ठ नागरिक मंडळाच्या वतीने दादा-दादी पार्कमधील पुष्पावती बवले सभागृहात या सोहळ्याचे आयोजन करण्यात आले होते.
लेखक संजय साखळे लिखित या ग्रंथाच्या प्रकाशनावेळी सभागृहात साहित्यप्रेमी, सामाजिक कार्यकर्ते आणि विविध क्षेत्रातील मान्यवरांची लक्षणीय उपस्थिती होती. कार्यक्रमाच्या अध्यक्षस्थानी नगराध्यक्षा संतोष हरिभाऊ दाभाडे (पाटील) होते, तर प्रमुख पाहुणे म्हणून आमदार सुनिल शेळके उपस्थित होते. विशेष म्हणजे ८९ व्या अखिल भारतीय मराठी साहित्य संमेलनाचे अध्यक्ष डॉ. श्रीपाल सबनीस यांच्या हस्ते ‘अस्तोदय’चे औपचारिक प्रकाशन करण्यात आले.
प्रकाशनावेळी बोलताना लेखक संजय साखळे यांनी या ग्रंथामागील प्रेरणा उलगडली. तळेगाव दाभाडेची माती ही पराक्रम, संस्कार आणि स्वप्नांना आकार देणारी आहे. या भूमीतून उभ्या राहिलेल्या अनेक कर्तृत्ववान व्यक्तींची प्रेरणादायी कथा ‘अस्तोदय’मधून मांडण्याचा प्रयत्न केला आहे, असे त्यांनी सांगितले.
या पुस्तकात गावाच्या प्रगतीसाठी योगदान देणाऱ्या विविध क्षेत्रातील व्यक्तिमत्त्वांचा वेध घेतला आहे. समाजसेवेची धुरा सांभाळणारे कार्यकर्ते, शिक्षणाचा दीप प्रज्वलित करणारे मार्गदर्शक, उद्योगविश्वाला चालना देणारे उद्योजक आणि सांस्कृतिक वारसा जपणारे अभ्यासक यांच्या कार्याचा प्रभावी आलेख या ग्रंथात रेखाटण्यात आला आहे. त्यामुळे ‘अस्तोदय’ हा केवळ चरित्रग्रंथ न राहता तळेगावच्या विकासाचा सजीव दस्तऐवज ठरत असल्याचे मत उपस्थितांनी व्यक्त केले.
सभागृहात उपस्थित रसिकांनी पुस्तकाचे स्वागत करताना लेखकाच्या प्रयत्नांचे कौतुक केले. कार्यक्रमात साहित्य, समाज आणि संस्कृती यांचा सुंदर संगम अनुभवायला मिळाला.
हे पुस्तक म्हणजे भूतकाळाचा सन्मान, वर्तमानाचा अभिमान आणि भविष्याचा आशावाद आहे, असे सांगत लेखकाने हा ग्रंथ तळेगाव घडवणाऱ्या प्रत्येक हाताला समर्पित केला. ‘अस्तोदय’मुळे स्थानिक इतिहासाला नवी ओळख मिळेल, असा विश्वास यावेळी व्यक्त करण्यात आला.
