आमदार सुनील शेळके यांच्या पाठपुराव्याला यश. आंद्रा धरणातून तळेगावला ५.०१४ दशलक्ष घनमीटर पाणी मंजूर.

आमदार सुनील शेळके यांच्या पाठपुराव्याला यश. आंद्रा धरणातून तळेगावला ५.०१४ दशलक्ष घनमीटर पाणी मंजूर.

तळेगाव दाभाडे : शहराच्या दीर्घकालीन पाणीपुरवठ्याचा प्रश्न मार्गी लावणारा महत्त्वपूर्ण निर्णय अखेर शासनाने जाहीर केला असून, आंद्रा धरणातून घरगुती वापरासाठी ५.०१४ दशलक्ष घनमीटर पाण्याचे आरक्षण मंजूर करण्यात आले आहे. महाराष्ट्र सुवर्ण जयंती नगरोत्थान महाअभियानांतर्गत घेतलेल्या या निर्णयामुळे तळेगाव दाभाडेच्या वाढत्या नागरी गरजांना भक्कम आधार मिळणार असल्याची प्रतिक्रिया विविध स्तरांतून उमटत आहे.

मावळ तालुक्यात झपाट्याने वाढणारी लोकसंख्या, विस्तारत चाललेली वसाहती आणि औद्योगिक विकासाचा वेग लक्षात घेता पाणीपुरवठ्याचा प्रश्न अधिक गंभीर बनत होता. याच पार्श्वभूमीवर सन २०४८ पर्यंतचा दीर्घकालीन आराखडा डोळ्यासमोर ठेवून हे पाणी आरक्षण निश्चित करण्यात आले आहे. कोणत्याही शहराच्या विकासाची पायाभूत गरज असलेल्या पाण्याच्या उपलब्धतेत वाढ झाल्याने तळेगावच्या सर्वांगीण प्रगतीस गती मिळणार असल्याचा विश्वास व्यक्त होत आहे.

यापूर्वी शहराला इंद्रायणी आणि पवना नदीतून काही प्रमाणात पाणीपुरवठा केला जात होता. मात्र, वाढत्या मागणीच्या तुलनेत हे स्रोत अपुरे पडत असल्याने नागरिकांना वारंवार पाणीटंचाईचा सामना करावा लागत होता. उन्हाळ्यात परिस्थिती अधिकच बिकट होत असून, पाणीपुरवठ्याच्या अनियमिततेमुळे दैनंदिन जीवनावर परिणाम होत होता. आंद्रा धरणातून मंजूर झालेले अतिरिक्त पाणी उपलब्ध झाल्यानंतर ही परिस्थिती मोठ्या प्रमाणात सुधारण्याची शक्यता व्यक्त केली जात आहे.

दरम्यान, या पाणी आरक्षणासोबत शासनाने काही महत्त्वपूर्ण अटी व शर्ती घालून दिल्या आहेत. मंजूर पाण्याच्या वापरासाठी आवश्यक करारनामा करणे, शास्त्रोक्त पद्धतीने वितरण व्यवस्था उभारणे, जलप्रदूषणावर नियंत्रण ठेवणे आणि संबंधित प्राधिकरणाच्या मार्गदर्शक तत्त्वांचे काटेकोर पालन करणे बंधनकारक राहणार आहे. तसेच, मंजूर आरक्षणानुसार प्रत्यक्ष पाणी उचल प्रक्रिया निश्चित कालावधीत सुरू न झाल्यास हे आरक्षण रद्द करण्याची तरतूदही स्पष्ट करण्यात आली आहे.

या निर्णयामागे आमदार सुनील शेळके यांचा सातत्यपूर्ण पाठपुरावा निर्णायक ठरल्याचे सांगितले जात आहे. त्यांनी आंद्रा धरणातून तळेगावला पाणी मिळावे यासाठी शासनदरबारी सातत्याने पाठपुरावा करत हा मुद्दा प्राधान्याने मांडला होता. त्यांच्या प्रयत्नांना अखेर यश मिळाल्याने नागरिकांनी समाधान व्यक्त केले आहे.

एकूणच, तळेगाव दाभाडे शहरासाठी हा निर्णय गेमचेंजर ठरण्याची चिन्हे आहेत. भविष्यातील पायाभूत सुविधा प्रकल्प, औद्योगिक गुंतवणूक आणि वाढत्या नागरीकरणाच्या पार्श्वभूमीवर पाणीपुरवठ्याची सक्षम व्यवस्था उभी राहण्यास या निर्णयाचा मोठा हातभार लागणार आहे. पाणीटंचाईच्या समस्येतून मुक्ततेची आशा बळावल्याने तळेगावकरांमध्ये समाधानाचे वातावरण निर्माण झाले आहे.

मावळ दर्पण