नशेच्या पैजेचा घातक शेवट. दारूच्या जुगारात तरुणाचा बळी. मृतदेहाची विल्हेवाट लावून पुरावा नष्ट करण्याचा प्रयत्न
नशेच्या पैजेचा घातक शेवट. दारूच्या जुगारात तरुणाचा बळी. मृतदेहाची विल्हेवाट लावून पुरावा नष्ट करण्याचा प्रयत्न
नवलाख उंब्रे:
नवलाख उंब्रे परिसरात माणुसकीला काळीमा फासणारी आणि नशेच्या विकृतीचे भयावह दर्शन घडवणारी घटना उघडकीस आली आहे. केवळ दारू पिण्याच्या पैजेपोटी एका तरुणाचा जीव गेला असून, या मृत्यूला अपघाताचे स्वरूप देण्यासाठी आरोपींनी मृतदेहाची विल्हेवाट लावल्याचा धक्कादायक प्रकार समोर आला आहे. या प्रकरणामुळे संपूर्ण परिसर हादरून गेला आहे.
मंगळवारी (दि. ३०) दुपारी सुमारे तीन वाजण्याच्या सुमारास नवलाख उंब्रे येथील एका शेतात ही काळजाला चटका लावणारी घटना घडली. रामकुमार साह असे मृत तरुणाचे नाव असून तो मजुरी करून उदरनिर्वाह करत होता. कृष्णा सिंह (वय ३५) आणि विकास कुमार या दोघांनी रामकुमारसोबत दारू पिण्याची पैज लावली होती. पैज जिंकण्याच्या हव्यासापोटी त्यांनी रामकुमारला अतिप्रमाणात दारू पिण्यास भाग पाडले.
दारूच्या अतिरेकामुळे रामकुमारची तब्येत अचानक बिघडली. तो जागेवरच कोसळला. मात्र माणुसकी दाखवून त्याला तातडीने रुग्णालयात दाखल करण्याऐवजी आरोपींनी निर्लज्जपणे दुर्लक्ष केले. “दारू उतरली की बरा होईल” या निष्काळजी मानसिकतेत त्यांनी वेळ दवडली. वैद्यकीय उपचार न मिळाल्याने रामकुमारचा दुर्दैवी मृत्यू झाला.
मृत्यू झाल्याचे लक्षात येताच आरोपींच्या पायाखालची वाळू सरकली. कायदेशीर कारवाईपासून बचाव करण्याच्या उद्देशाने त्यांनी गुन्ह्याचा पुरावा नष्ट करण्याचा कट रचला. मृतदेहाची विल्हेवाट लावून हा प्रकार दडपण्याचा प्रयत्न करण्यात आला. मात्र सत्य जास्त काळ लपून राहत नाही, हे पुन्हा एकदा सिद्ध झाले.
या प्रकरणी तळेगाव एमआयडीसी पोलीस ठाण्याचे पोलीस उपनिरीक्षक दीपक खरात यांनी फिर्याद दिली असून कृष्णा सिंह व विकास कुमार यांच्याविरोधात गंभीर स्वरूपाचा गुन्हा दाखल करण्यात आला आहे. पोलिसांनी तात्काळ कारवाई करत मुख्य आरोपी कृष्णा सिंह याला अटक केली आहे, तर दुसरा आरोपी विकास कुमार फरार असून त्याचा कसून शोध सुरू आहे.
या घटनेने नशेच्या आहारी गेलेल्या तरुणाईसमोरील धोका पुन्हा अधोरेखित झाला असून “मजेसाठीची पैज मृत्यूचा सापळा ठरू शकते” याचा भयानक इशारा समाजासमोर उभा राहिला आहे. तळेगाव एमआयडीसी पोलीस या प्रकरणाचा सखोल तपास करत आहेत.
